MANUEL DA ZIRA : Biografia
Sortit de Merinhac o de Bordèu, aquí un nom que remembra pas gran causa a gran monde. Autor compositor, mc dj, aqueth merinhaqués es totun investit dempuish mei de 15 ans dens lo mond deu reggae… Quauquas explicas !

Flash back : 1985, nada data e copacaps son au programa a Merinhac. Per las ciutats de la vila, los vielhs, un còp especializat dens lo raubatòri de mobiletas e de ràdios, segueishen lo camin deus ainats, s’atacan aus ostaus e ostalàs que costejan, e començan atau la longa e fatala devarada aus infèrns…

Un còp las aurelhas empleadas de ròck (Led Zep, AC/DC, Status Quo, Queen) e de cançons francesas (Renaud, Cabrel, F. Lalanne), lo joen Manu dèisha córrer l’aurelha au son de çò qu’escotan los ainats de la ciutat : en efèit, au bèth miei de las annadas 80, es pas mei lo ròck que simboliza la musica rebèla, mes aqueth ritme binari que los contra-temps ne vienen de la Jamaïca, lo Reggae, Bob Marley a desapareishut quauques cinc ans abans. E aquera musica, que tot lo monde pensavan destinada a la medisha fin, resista, s’enrasigant dens los barris mei cauds de totas las vilas de França.

Es atau que sus las auto-ràdios, los walkmans e las hi-fi, desfilan los àlbums de Steel Pulse (Earth Crisis), Marley, (Uprising, Confrontaion, Babylon by bus) o encara Pablo Moses (In the Future).

Aganit d’escriuts de Francís Dordor, Bruno Blum o Hélène Lee, ahuegat de bibliotècas, en quista de vièlhs numèros de Best o Rock and Folk, dèisha pas de s’informar sus la cultura jamaïcana e sus aquera musica qu’es a descobrir tanben dab l’intermediari de l’emission de Feeling Black Machine, sus praube Graffiti FM 101.7 presentat per Edgar « Junior » Gomez (actuau President de Black Box 103.7 Bordèu) e lo mus locau, Docteur Jocka. Son aqueths darrèirs que lo van balhar la prumèira escadença en lo hidar, tan plan com au Nico, lo son alter ego merinhaqués, l’orari deu dimars ser, de 10h a miejanuèit, libre e disponible per una emission tematica reggae. Manu es au micro, Nico a la realizacion tecnica… l’emission s'apèra Cool Runnings, l’aventura pòt començar…

Es d’aqueth temps que datan tanben los prumèirs rencontres dab los jamaÏcans de passatge a Bordèu e, totun, mes après mes, va créisher una lista de noms prestigiós : Pablo Moses, Culture, Burning Spear, Gladiators, Mutabaruka, Toots e un hèish d’autes. Que van desfilar au micro mudadís de « Cool Running ». Plan pensada, l’emission receb, deus labèls màgers deu reggae (Ras Ariwa, Greenleeves), las darrèiras nautats e atau arriban sus los burèus de Rock’n Ragga, la tota joena asso, de meravilhas com los àlbums de Israël Vibration (Strength of my life), Ini Kamoze (Shoking out), Yellowman (Rides again), o encara lo live de Burning Spear au Zenit. Desfilan tanben sus las platinas, los prumèirs sons que vienen de París o de Marselha, Pablo Master, Princesse Erika, Massilia Sound System, Supa Jhon, Daddy Yod…

En 1988 FM GRAFFITI costeja la galihòrça, tornada crompada per un malhum nacionau, aqueste cambia la grasilha deus programas, e dèisha càder las emissions en plaça. Los dus Raggamufins se tròban au caumatge tecnic e faudrà esperar 1991 e l’emission « Ragga N Co » per tornar véder los dus Raggamufins de la banda FM.

D’aqueth temps, Manu, que tòca la guitarra, entinoa una iniciacion au skank, encontra l’artista martiniqués Bongo Fire e entra dens la tropa deus « Radical Roots » com guitarrista ritmic. Es ad aquera epòca que dab lo son companh de longas, Chico, s’inicia tanben a l’organizacion de concèrts e a la jòia deu mitan associatiu (presentacion, animacion, espandiment, promocion) sustot a l’entorn de manifestacions com lo Memoriau Marley, sala deu Gran Parc Bordèu 1990 o encara lo praube e plan precursor Reggae Festival d’Arcaishon.

1991 - retorn sus la FM de Bordèu dab l’emission Ragga N Co sus Frequéncia 4… Es lo periòd de l’apassionament per lo Raggamufin en França : Tonton David bota lo huec dab « Peuple du monde », Nuttea arriba dab « Un DJ parmi des millions de DJ » e los Saïsaï enregsitran adab Mafia and Fluxy… Alavetz, los tres panhcòs activan lor projècte navèth, « Double Embrouille Sound System » : una formula plan simpla, plan emplegada : un selector (Chico), dus DJ (Manu e Nico) que toastan prumèir sus viniles e CD, puish, dab la vienguda de Bouyax, sus un poderós sistèma numeric 16 pistas digitau. L'equipa va virar de 1993 a 2003, en har au passatge mei de 300 concèrts pertot capvath França, e sustot una virada en 1996 en prumèira partida deu grop jamaïcan « Third world ». Enregistrarà mantuns Streets Tapes, dus àlbums, lo 6 títols « Bouillant, Sincère et pas Corrompu » signat sus lo labèl Basc Agorila (que lo paréisher òrre n’empacharà tota utilizacion promocionala) e l’àlbum « Foi 2 Ragga » distribuït per lo praube Tripsichord.

A la desseparacion de l'equipa Double Embrouille, en 2003, Manu vad Manuel Da Zira, e gaha lo son camin tot solet...

De seguir…