Après mei de 10 ans passats per los camins de França e de Navarra, ras e ras dab Nico, lo miejon deu duo raggamuffin "Double Embrouille", Manuel Da Zira nos tòrna en sòlo, guitarra a la man, dab aqueth prumèir àlbum "Portugues suave" produit e realizat per Bi-Bip Production.

A torns passats animator ràdio, jornalista, musicaire (Bongo Fire and the Radical Roots), autor compositor Dj, Manuel Da Zira nos balha son prumèir àlbum, frut deus 15 ans d'implicacions de totas dens lo mitan deu Reggae.

B'aimaram la fiertat latina e lusitana de "Portugues suave", mes tanben lo clinhet d'uelh a la vila de Bordèu (Des travaux), quauques comentaris sociaus e professionaus plan peberuts ("Tout le Monde se plaint", "l'Afficheur"), las tradicionaus òdas a Occitania ("Occitanie is a must", "Raggamuffin local"), o encara dens aqueth parlar tipic deu nòrd de Portugau, lo títol "Os Veilotinhos" en omenatge aus vielhs deu son vilatge despartits.

Quauques amics son venguts ajudar per l'elaboracion d'aqueste àlbum. S'i tròban, darrèir quauquas linhas de baisha, la man de Omar Khemri (Bongo Fire, Billy ze Kick, Cresus). Los coneishedors remarcaràn la preséncia de Yannique YAYA Emonide (Some Style Band) e de Patrick Tomo-Mothes, venguts har petar la cantèra, mentre que la realizacion de l'àlbum estó hidada au famós Bouyax (Niominka-bi, Double Embrouille, Seyni).

Avem aquí un navèth àlbum saborós, umble e sincèr, bèth chic lunh de la tendéncia ragga actuau. Ací nat "bling bling", nada culejada de hemnas ajacadas sus 4x4 lusents, nada serada estranha sus las peladas deu sable fin... nani, ací, parlam plan de reggae locau, simple, pensat e hèit de casa.

Reggae umble, 100% hèit de vita vitanta, que poderé hòrt plan se resumir per la formula tostemps valedera deu praube "Double Embrouille" : "Reggae de tot dia, entà monde de tot dia, per monde de tot dia" !!